شانِ رسالت ہم سے نہ پوچھو، پوچھو پوچھو قرآں سے

شانِ رسالت ہم سے نہ پوچھو، پوچھو پوچھو قرآں سے

رب کی عنایت ہم سے نہ پوچھو، پوچھو پوچھو قرآں سے

---

نورِ محمد پہلے بنا پھر آدم کی تخلیق ہوئی

یہ اولیت ہم سے نہ پوچھو، پوچھو پوچھو قرآں سے

---

ثُمَّ دَنَا فَتَدَلیّٰ سے تا قَابَ قَوْسَیْن اَوْ اَدْنیٰ

شانِ رفعت ہم سے نہ پوچھو، پوچھو پوچھو قرآں سے

---

واللیل و والشمّس سے ظاہر زلف و رخِ زیبا ان کا

حسنِ نہایت ہم سے نہ پوچھو، پوچھو پوچھو قرآں سے

---

رب کے حکم سے مکہ چھوڑا طیبہ نگر آباد کیا

واقعہء ہجرت ہم سے نہ پوچھو، پوچھو پوچھو قرآں سے

---

رب نے ان کو خزانے بخشے، جنت مانگو جنت دیں

ان کی قدرت ہم سے نہ پوچھو، پوچھو پوچھو قرآں سے

---

نفسی نفسی سب کے لب پر اَنَا لھَا سرکار کہیں

شانِ شفاعت ہم سے نہ پوچھو، پوچھو پوچھو قرآں سے

---

ان کا دشمن رب کا دشمن ان کا دوست اللہ کا ولی

رب سے قربت ہم سے نہ پوچھو، پوچھو پوچھو قرآں سے

---

یَعْطِیْک فرما کر رب نے ان کو سب کچھ بخش دیا

کو ثر و کثرت ہم سے نہ پوچھو، پوچھو پوچھو قرآں سے

---

آؤ نظمی ہر دم بس اللہ و رسول کا ذکر کریں

ذکر کی برکت ہم سے نہ پوچھو، پوچھو پوچھو قرآں سے