تنویرِ شش جہات ہے روپوشِ نقش پا
کنزِ جمالیات ہے روپوشِ نقشِ پا
بہرِ شفائے ہر مَرضِ ظاہر و خفی
ترکیبِ اَدویات ہے روپوش نقش پا
تصدیق کو بچا لیا دامانِ نَعل نے
خیلِ تصورات ہے روپوشِ نقشِ پا
سَر میں ہے سِرِّ ممتنع و واجب الوجود
تشریحِ ممکنات ہے روپوشِ نقشِ پا
خوشبوئے رہگزر میں ہے گُم عقلِ مشک و گُل
رنگوں کی کائنات ہے روپوشِ نقش پا
موسائے دل کی حدِّ طلب خاکِ رہگزر
برقِ تجلیات ہے روپوشِ نقشِ پا
غازہ رخِ جمال کو ذرّاتِ نعل ہیں
یوسف کی التفات ہے روپوشِ نقشِ پا
مخفیِٔ نعلِ شاہ نِہایاتِ مجد و فوز
اوجِ ترفّعات ہے روپوشِ نقشِ پا
بجھ جائے کیوں نہ کوثر و تسنیم کی عَطَش
بحرِ نوازشات ہے روپوشِ نقشِ پا
پتّھر قدم کو چومے تو دائم نشاں رہے
کیا قدرتِ ثبات ہے روپوشِ نقشِ پا
وصفِ رخِ رسول معظم میں کیا لکھوں
خامہ ہے گم، دوات ہے روپوشِ نقشِ پا
شاعر کا نام :- معظم سدا معظم مدنی
کتاب کا نام :- سجودِ قلم