تریؐ نورانی بستی میں چلوں آہستہ آہستہ

تریؐ نورانی بستی میں چلوں آہستہ آہستہ

قدم ارضِ مقدس پر دھروں آہستہ آہستہ

---

ادب کا یہ تقاضا ہے کہ میں فرطِ عقیدت سے

کہوں صلِّ علیٰ لیکن کہوں آہستہ آہستہ

---

ترا اسمِ مبارک اِحتراماً صاف کاغذ پر

لکھوں میں ہَولے ہَولے اور پڑھوں آہستہ آہستہ

---

زیادہ دیر تک فرصت ملے مجھ کو زیارت کی

مجھے مرنا تو ہے لیکن مرُوں آہستہ آہستہ

---

مری خواہش کہ صبح و شام جا کر تیری چوکھٹ پر

جھکوں میں دھیرے دھیرے اور اُٹھوں آہستہ آہستہ

---

کوئی لغزش نہ سرزد ہو قدم بوسی کی خواہش میں

یہ منزل طے کروں لیکن کروں آہستہ آہستہ

---

زیادہ دیر تک یہ ذائقہ باقی رہے مُنہ میں

ترا جب نام لینا ہو تو لوں آہستہ آہستہ