اُن کا تصور اور یہ رعنائیِ خیال

اُن کا تصور اور یہ رعنائیِ خیال

دل اور ذہن محوِ پذیرائیِ خیال

---

مرکز ہوں اک وہی مِرے ذوق ِخیال کے

یکتا ہیں وہ، تو چاہیے یکتائیِ خیال

---

ممکن نہیں کہ وصف بیاں اُن کے ہوسکیں

محدود کس قدر ہے یہ پہنائیِ خیال

---

بے حرف و صورت بھی یہاں ممکن ہے التجا

کافی ہے عرضِ حال کو گویائیِ خیال

---

ہر ذرّہ بارگاہِ نبیؐ کا، چراغِ ذہن

خاکِ مدینہ، سُرمۂ بینائی ِخیال

---

بے جان اپنی سوچ ہے، بے رُوح اپنا ذوق

درکار ہے ہمیں بھی مسیحائیِ خیال

---

مِلتی ہے صِرف اُن کی توجّہ کے نُور سے

تنہائیوں میں انجمن آرائیِ خیال

---

اُنؐ کے بغیر رنگ نہ ہو کائنات میں

ہے اُنؐ کے دَم سے زینت و زیبائیِ خیال

---

اوروں کے در پہ جانے کا سوچُوں مَیں کیوں نصیرؔ

مجھ کو نہیں قبول یہ رُسوائیِ خیال