وہ دن بھی آئیں گے، ہوگی بسر مدینے میں

وہ دن بھی آئیں گے، ہوگی بسر مدینے میں

ہمارے گزریں گے شام و سحر مدینے میں

---

دُعائے دل کے لیے ہے اثر مدینے میں

ہمارے درد کا ہے چارہ گر مدینے میں

---

نہیں کہاں پہ خدا و رسولؐ کے جلوے

اِدھر تو مکّے میں ہیں اور اُدھر مدینے میں

---

کھُلے نصیب ہمارا بھی مثلِ بادِ صبا

رسائی روز ہو وقتِ سحر مدینے میں

---

کسی دیار کی جانب بس اب نہ اُٹّھے گی

ٹھہر گئی ہے ہماری نظر مدینے میں

---

درِ رسولؐ پہ جاؤں، وہیں کا ہو جاؤں

یہ چاہتا ہُوں، رہوں عُمر بھر مدینے میں

---

دل و نگاہ میں اب تک ہے ایک کیف و سُرور

سُکون کے تھے وہ آٹھوں پَہَر مدینے میں

---

یہ آرزو تھی کہ یُوں زندگی بسر کرتے

شب اپنی مکّہ میں ہوتی، سحر مدینے میں

---

مُحب، حبیبؐ سے ہرگز جدا نہیں ہوتا

خدائے پاک ہے خود جلوہ گر مدینے میں

---

نصیرؔ! نقشِ کفِ پائے مصطفٰےؐ کے سبب

تمام ذرّے ہیں لعل و گُہَر مدینے میں