ظلمتِ شب ہوگئی رخصت ہوئی ضوبار صبح

ظلمتِ شب ہوگئی رخصت ہوئی ضوبار صبح

لے کے آئی مژدہائے آمدِ سرکار صبح

---

سلسلہ اِک نور کا ہے خاکداں تا آسماں

منفرد انداز میں روشن ہوئی اس بار صبح

---

جس کے آگے ماند ہے مہرِ درخشاں کی چمک

لے کے وہ خورشیدِ رحمت آج ہے ضوبار صبح

---

ہو گئی بعثت شہِ کونین کی، وقتِ سحر

سو جتن کے ساتھ ہے جلوہ نما اس بار صبح

---

جس قدر بھی ناز کر، کم ہے حلیمہ سعدیہ

تیری خوش بختی کی ایسی ہوگئی اس بار صبح

---

کیوں نہ رقصاں ہو تبسم ہر لبِ مغموم پر

آگئے ہیں شادمانی کی لیے ضوبار صبح

---

اللہ اللہ کس قدر دلکش ہے طیبہ کی فضا

شام ہے پر کیف جس کی اور ہے ضوبار صبح

---

کر عطا مجھ کو بھی یا رب شامِ طیبہ کا سماں

ہو مدینے میں مری بھی یا خدا اِک بار صبح

---

ہاں مگر طیبہ کی صبحِ جانفزا کچھ اور ہے

یوں تو ہوتی ہے یہاں پر اِک نئی ہر بار صبح

---

ہو عطا احسؔن کو آقا دیدِ طیبہ کا شرف

یہ بھی دیکھے رحمتوں کی شام اور ضوبار صبح