آپؐ ہیں طغرائے آیاتِ ظہور آقا حضورؐ
آپ ہیں ملجائے ساعاتِ نشور آقا حضورؐ
آپؐ کا پیرایہ ہستی جمالِ زندگی
آپؐ ہیں ہر دَور میں ذہنوں کا نور آقا حضورؐ
آپؐ کا ذکرِ مبارک آبروئے حرف و صوت
آپؐ سے رعنائی فکر و شعور آقا حضورؐ
جس کی سر شاری ابد کی سرحدوں سے جاملے
درد مندوں کو ملے ایسا حضور آقا حضورؐ
التفاتِ خاص کا ہو لفظ لفظ آئینہ دار
نعت ہو سرچشمہ جذب و سُرور آقا حضورؐ
شاعر کا نام :- حفیظ تائب
کتاب کا نام :- کلیاتِ حفیظ تائب