رنگِ فطرت آپؐ کے فیضان سے نِکھرا حضورؐ
آپ کی آمد سے پہلے کب یہ نقشہ تھا حضورؐ
آپؐ کادینِ حیات آموز جب پھیلا حضورؐ
مِٹ گئی یکسر تمیزِ بندہ و مولا حضورؐ
مسکرایا بختِ محزوں آدمیّت کا حضورؐ
رنگ لایا خلوتوں میں آپؐ کا رونا حضورؐ
دیدہ ہستی نے دیکھا ہے نہ دیکھے گا حضورؐ
آپؐ سا خلوت گزیں و انجمن آرا حضورؐ
آپؐ کی رفعت کا نا ممکن ہے اندازہ حضورؐ
کہہ دیا جب حق نے سُبْحٰنَ الَّذِی اَسْریٰ حضورؐ
حشر پھر ہے کائناتِ رُوح میں برپا حضورؐ
بے نواؤں پر ہو پھر بابِ عنایت وا حضورؐ
عافیت کی ساری قدریں ہیں تہ و بالا حضورؐ
ہوگیا ہے سخت مشکل سانس بھی لینا حضورؐ
آج پا مالِ ستم ہے فکر بھی میرا حضورؐ
اب مسائل سے نمٹنے کا نہیں یارا حضورؐ
داغِ محرومی دکھاؤں آپ کو کیا کیا حضورؐ
کس قدر احباب میں ہوں کس قدر تنہا حضورؐ
زندگی تائب کی ہے تپتا ہُوا صحرا حضورؐ
آپؐ کے الطاف کا سر پر رہے سایا حضورؐ
شاعر کا نام :- حفیظ تائب
کتاب کا نام :- کلیاتِ حفیظ تائب