احد کی حد جان کے تُو ذاتِ احمد کو جان
روپ میں احمد کے تو احد کی وحدت کو پہچان
کعبے کا کعبہ گنبدِ خضریٰ جس کی نرالی شان
ارضِ مدینہ میں تیرے صدقے میں تیرے قربان
مکہ کی گلیاں جس کی مہک سے مہکیں صبح و شام
وہ ہے پسینہ میرے نبی کا مشک نہیں نادان
روضہء اقدس نور کا مرکز قبلہء اہلِ دل
اتریں فرشتے جس کی سلامی کو ہر پل ہر آن
نامِ محمد لے کر دیکھو سب آفت ٹل جائے
ہر دل کا دکھ دور کرے ان کی میٹھی مسکان
قبر میں آکے میری فرشتے جب پوچھیں گے سوال
میں ہوں غلامِ شاہِ مدینہ کردوں گا اعلان
نظمی تم کو دوزخ کا ڈر آخر کیوں اتنا
آئیں گے آقا تم کو بچانے جی نہ کرو ہلکان
شاعر کا نام :- سید آل رسول حسنین میاں برکاتی نظمی
کتاب کا نام :- بعد از خدا