اللہ نور، نور کا پیکر حضورؐ ہیں

اللہ نور، نور کا پیکر حضورؐ ہیں

سارے پیمبروں کے پیمبر حضورؐ ہیں

---

اُن کا عدم بھی لمحہء موجود کی طرح

منظر حضورؐ ، پردہء منظر حضورؐ ہیں

---

بنیاد ہے درود ، عمارت ہے زندگی

تن میں ہے سانس، سانس کے اندر حضورؐ ہیں

---

سیراب اُن سے ہوتا رہے گا ہر ایک دور

انسانیت ہے پیاس، سمندر حضورؐ ہیں

---

مانگوں خدا سے کیا مجھے سب کچھ تو مل گیا

کیا یہ شرف ہے کم کہ میسّر حضورؐ ہیں

---

ہوتا ہے ختم آپؐ پہ ہر ایک راستہ

دنیا ہے ایک قافلہ، رہبر حضورؐ ہیں

---

کون و مکانِ عشق ہے میرا وجود بھی

ہر وقت میرے ساتھ مظفر حضورؐ ہیں