بحرِ مدحت کا سفر شہرِ مدینہ کی طرف
’’سطرِ مدحت کا سفر شہرِ مدینہ کی طرف‘‘
اہلِ یثرب کی بڑھی پیاس جو ، مکّہ سے ہوا
ابرِ مدحت کا سفر شہرِ مدینہ کی طرف
مرے وجدان میں ، ادراک میں ہے انؐ کی ثنا
فکرِ مدحت کا سفر شہرِ مدینہ کی طرف
منتقل میرے خیالات حضوری میں کرے
ذکرِ ِمدحت کا سفر شہرِ مدینہ کی طرف
اتنے وصّافِ پیمبرؐ ہیں یہاں ، جیسے ہو
شہرِ مدحت کا سفر شہرِ مدینہ کی طرف
ہجرتِ سیّدِؐ عالم کا تصوّر جیسے
مہرِ مدحت کا سفر شہرِ مدینہ کی طرف
جب بڑھے حد سے مظالم ہوا لازم طاہرؔ
بدرِ مدحت کا سفر شہرِ مدینہ کی طرف
شاعر کا نام :- پروفیسر محمد طاہر صدیقی
کتاب کا نام :- طرحِ نعت