دیتا نئی حیات ہے عشقِ رسولِؐ پاک
کَرتا عطا ثبات ہے عشقِ رسولِؐ پاک
جس کے مکین ہیں غمِ دوراں سے بے نیاز
اک ایسی کائنات ہے عشقِ رسولِؐ پاک
دنیا و آخرت میں ہے ضامن فلاح کا
پروانہ نجات ہے عشقِ رسولِؐ پاک
لذّت کو اس کی جانتے ہیں اس کے آشنا
اک ایسی واردات ہے عشقِ رسولِؐ پاک
منزل کا حکم رکھتا ہے تائبؔ سلوک میں
گویا شعورِ ذات ہے عشقِ رسولِؐ پاک
شاعر کا نام :- حفیظ تائب
کتاب کا نام :- کلیاتِ حفیظ تائب