حرم کا دیدہ بیدار روضتہ الجنہ
ازل نما ، ابد آثار روضتہ الجنہ
جہاں پہنچ کے سکوں پائے دیدہ بھی، دل بھی
وہ پُر بہار و پُر انوار روضتہ الجنہ
ہر اسطوانہ ہے عہدِ رسولؐ کا عکاس
نہ کیوں ہو اور ضیا بار روضتہ الجنہ
سدا دکھاتا ہے خیر القرون کے منظر
ہے گویا آئنہ بردار روضتہ الجنہ
مہک رہا ہے جو انفاسِ زیست پرور سے
وہ حسن و خیر کا گلزار روضتہ الجنہ
بہارِ زیست ہے وہ روضہ جانِ اہلِ نظر
نشاطِ خاطرِ ابرار روضتہ الجنہ
شاعر کا نام :- حفیظ تائب
کتاب کا نام :- کلیاتِ حفیظ تائب