آپ ہیں جانِ ارض و سما
شانِ خُلقِ خدا آپ ہیں
زندگی کی بہار آپ سے
حُسن ہر دور کا آپ ہیں
سر سے پا تک محمدؐ ہیں آپ
اور محمودؐ و احمدؐ ہیں آپ
افتخارِ اب وجد ہیں آپ،
خاتم الانبیا آ پ ہیں
شاہِ دنیا و عقبیٰ حضورؐ
جاں نواز و دل آرا حضورؐ
خوش لقا ، خوش ادا، خوش نوا
مجتبیٰؐ ، مصطفاؐ آپ ہیں
آپ ہیں شاہِ والا نسب،
خیرِ خَلق اور محبوبِ رب
آپ ہیں روحِ صدق و صفا،
آبروئے وفا آپ ہیں
آپ جیسا کوئی دوسرا
آسکا ہے نہ اب آئے گا
آپ تاحشر ہیں رہنما ،
آفتابِ ہدیٰ آپ ہیں
کیوں نہ گُن آپ کے گائیں ہم ،
آپ سے جب سکوں پائیں ہم
کیوں گناہوں پہ گھبرائیں ہم
جب شفیع الورا آپ ہیں
نطق ہے عالمِ رنگ و بو،
خُلق قرآن ہے ہوبہو
آپ تائب کی ہیں آبرو
بے نوا کی نوا آپ ہیں
شاعر کا نام :- حفیظ تائب
کتاب کا نام :- کلیاتِ حفیظ تائب