طیبہ میں پہلا نقش حَسَن مسجدِ قُبا
تقویٰ کا دلنواز چمن مسجدِ قُبا
بنیاد جس کی رکھی نبیؐ و صحابہ نے
سر جلوہء تجلیء فن مسجدِ قُبا
جو پہلے دن سے حسنِ عمل پر ہے استوار
وہ یادگارِ شاہِ زمن مسجدِ قُبا
موزوں تھی جو عبادت ِ سرکارؐ کے لیے
ضوبار زیرِ چرخ کہن مسجدِ قُبا
عمرہ سا اجر رکھتی ہے جس میں نمازِ عام
تاریک شب میں پھوٹی کرن مسجدِ قُبا
شاعر کا نام :- حفیظ تائب
کتاب کا نام :- کلیاتِ حفیظ تائب