ہم بھی درِ رسول پہ جاتے تو بات تھی

ہم بھی درِ رسول پہ جاتے تو بات تھی

دل کا اُنہی کو حال سُناتے تو بات تھی

---

پی کر نبی کے عشق کا جامِ طہور ہم

تشنہ لبی یہ کاش ! بُجھاتے تو بات تھی

---

اِذنِ قیامِ شہرِ مدینہ کے بعد ہم

مسکن وہ ارضِ پاک بناتے تو بات تھی

---

دیدار کا اے کاش ! وہ اپنے فقیر کو

سپنوں میں ایک جام پلاتے تو بات تھی

---

اُسوہ مرے حضور کا، اے کاش ! اُمّتی

اِک مقصدِ حیات بناتے تو بات تھی

---

اولاد کو جو سرورِ کون و مکان کا

کردار و طرزِ زیست سکھاتے تو بات تھی

---

ہم پر کرم حضور کا ، کتنا ہوا جلیل

ہر شخص کو یہ بات بتاتے تو بات تھی