مری جنت کے پھولوں سے مدینے کا غبار اچھا
جہاں بھر کی بہاروں سے مرا جانِ بہارؐ اچھا
زمین و آسماں چلتے ہیں جس کے اک اشارے پر
ہزاروں بادہ خواروں سے نبیؐ کا بادہ خوار اچھا
بہت ہی لُطف آتا ہے نبی کو یاد کرنے میں
ملاقاتِ ملائک سے نبی کا انتظار اچھا
فرشتوں کی نظر تھکتی نہیں جس کی زیارت سے
سبھی چہروں سے بڑھ کر تیرے ؐ چہرے کا نکھار اچھا
شہید کربلا کہتے ہیں جس کو دو جہانوں میں
رسالت کی سواری پر وہی لگتا سوار اچھا
ارے یہ سوچنا بھی گویا توہینِ رسالت ہے
ابوبکر و عمر سے کون ہوگا پُر وقار اچھا
نبی کی حُرمت و ناموس پر جو مر مٹا انجؔم
کروڑوں جاں نثاروں سے وہی ہے جاں نثار اچھا
شاعر کا نام :- انجم نیازی
کتاب کا نام :- حرا کی خوشبُو