بدن میرا یہاں پر ہے مگر ہے جاں مدینے میں

بدن میرا یہاں پر ہے مگر ہے جاں مدینے میں

مری جنت، مری خوشبو، مری ہے ماں مدینے میں

---

یہاں تو مَیں مسافر ہوں یہاں کچھ بھی نہیں میرا

مرا آقا، مرا مولا، مرا سلطاں مدینے میں

---

مرے کانوں پہ دستک دیتی رہتی ہے صدا اس کی

بُلاتا ہے مجھے ہر وقت ہی قرآں مدینے میں

---

وہ کیونکر خوش نہ ہو جس کو ملے خوشبو مدینے کی

ہر اک پتھر ہر اک دیوار ہے نازاں مدینے میں

---

مَیں اس اُمید پر بیٹھا ہوں اس ویران جنگل میں

مری راحت، مری بخشش کا ہے ساماں مدینے میں

---

چمن کی ساری خوشبو میرے دامن سے لپٹتی ہے

صحابہ کے لیے ہر پھول نغمہ خواں مدینے میں

---

درِ فخر دوعالم سے کوئی خالی نہیں جاتا

خدا کی رحمتیں ہیں دم بہ دم رقصاں مدینے میں

---

ابوبکر و عمر کی شفقتیں ہوتی ہیں ساتھ اس کے

رہا کرتا نہیں تنہا کبھی انساں مدینے میں

---

عمر فاروق کے رعب اور اس کے خوف سے انجؔم

قدم رکھتا نہیں ہرگز کبھی شیطاں مدینے میں