تری دہلیز پر آیا ہوا خالی نہیں جاتا

تری دہلیز پر آیا ہوا خالی نہیں جاتا

کوئی بھی ہاتھ پھیلایا ہوا خالی نہیں جاتا

---

وہاں پر دل کے غنچے سارے کھل اٹھتے ہیں خوشیوں سے

کوئی بھی چہرہ مرجھایا ہوا خالی نہیں جاتا

---

وہاں تقسیم ہوتے ہیں خزانے دو جہانوں کے

کوئی بھی شخص بلوایا ہوا خالی نہیں جاتا

---

وہاں کا ہو کے رہ جاتا ہے اس کی واپسی کیسی

محبت سے کوئی آیا ہوا خالی نہیں جاتا

---

عقیدت جتنی گہری ہو وہ اتنی کام آتی ہے

کوئی بھی شعلہ بھڑکایا ہوا خالی نہیں جاتا

---

وہاں ہر پھول کو ملتی ہے دوبارہ نئی خوشبو

کوئی بھی پھول کملایا ہوا خالی نہیں جاتا

---

وہاں ٹوٹے ہوئے دل از سرِ نو جوڑے جاتے ہیں

کوئی سائل بھی ٹھکرایا ہوا خالی نہیں جاتا

---

ہزاروں خواہشیں لے کر وہاں آتے ہیں لوگ انجؔم

کوئی بھی آنسو چھلکایا ہوا خالی نہیں جاتا