چمکتی ہے میری جبیں تیرے غم سے

چمکتی ہے میری جبیں تیرے غم سے

کوئی غم نہیں ہے حسیں تیرے غم سے

---

یہ وسعت کہاں اس کی آب و ہوا میں

بہت کم ہے خُلدِ بریں تیرے غم سے

---

یہی ہے خدا کو بھی منظور شاید

تڑپتا رہوں میں یہیں تیرے غم سے

---

بگڑتی چلی جاتی ہے دل کی حالت

پگھل ہی نہ جائے کہیں تیرے غم سے

---

اُسے کیا خبر اِس میں لذّت ہے کتنی

جو انسان واقف نہیں تیرے غم سے

---

چراغوں کی صورت چمکنے لگی ہے

مرے چار جانب زمیں تیرے غم سے

---

لگے چوٹ تو اور بڑھتا ہے ایماں

نکھرتا ہے میرا یقیں تیرے غم سے

---

خدا اِن کو رکھے ہمیشہ سلامت

وہ شمعیں جو روشن ہوئیں تیرے غم سے

---

اچانک برسنے لگیں میری آنکھیں

کوئی تار ٹُوٹا کہیں تیرے غم سے