محبت فخر کرتی ہے عقیدت ناز کرتی ہے

محبت فخر کرتی ہے عقیدت ناز کرتی ہے

رسولِ ہاشمی سے ہےجونسبت ناز کرتی ہے

---

مِرے رب نے بلند اتنا کیا ہے ذکر آقا کا

ورفعنا لک ذکرک پہ رفعت ناز کرتی ہے

---

زبانِ رحمتِ عالم سے شاداں ہے ادا ہوکر

کلامِ پاک کی اِک ایک آیت ناز کرتی ہے

---

نہیں ہوتی کبھی رسوا درِ سرکارِ انور پر

اُٹھا کر اپنے ہاتھوں کو ضرورت ناز کرتی ہے

---

محمد مصطفےٰﷺ کے جسمِ انور کے پسینے پر

نچھاور مشک ہوتی ہے تو نکہت ناز کرتی ہے

---

نہیں ہے دولتِ حسنِ عمل تو غم نہیں مجھ کو

ہیں وہ شاہِ شفاعت جن پہ غربت ناز کرتی ہے

---

شفیقؔ اللہ نے ایسا بنایا رحمتِ عالم

جنابِ رحمتِ عالم پہ رحمت ناز کرتی ہے