ارے ناداں! نہ اِترا داغِ سجدہ جو جبیں پر ہے

ارے ناداں! نہ اِترا داغِ سجدہ جو جبیں پر ہے

مدارِ مغفرت عشقِ شفیع المذنبیں پر ہے

---

وہ جس نے قبرِ انور کی زیارت کی ہے آنکھوں سے

شفاعت اُس کی واجب رحمتہ للعالمیں پر ہے

---

تقدس باغِ جنت کا ہمیں معلوم ہے لیکن

ہم اہلِ عشق کی جنت مدینے کی زمیں پر ہے

---

تصدق ہے تمہی پر چاندنی بدرالدجیٰ آقا

مِرے شمس الضحیٰ خورشید بھی قرباں تمہیں پر ہے

---

نہیں انکار مجھ کو عظمتِ کعبہ سے اے زاہد

مگر کعبے کا کعبہ تو مدینے کی زمیں پر ہے

---

ریاضت پر، قیادت پر، تکلم پر، تبسم پر

فدا یہ دل نبی کی ہر ادائے دل نشیں پر ہے

---

شفیقؔ اپنا تو یہ ایقانِ کامل ہے اور ایماں بھی

شفاعت عاصیوں کی رحمتہ للعالمیں پر ہے