نبی کے نام سے جاگی ہے روشنی دل سے

نبی کے نام سے جاگی ہے روشنی دل سے

کہ جس نے جڑ سے اکھاڑی ہے تیرگی دل سے

---

سرورِ دین کی آمد پہ گھر سجاتے ہیں

غلام سب ہی مناتے ہیں یوں خوشی دل سے

---

گئے وہ عرشِ معلیٰ، مقامِ ادنیٰ تک

تو کی ہے پیش وہاں پر بھی عاجزی دل سے

---

عداوتوں کی گھنی دھوپ سہہ رہے تھے سبھی

ہوئے وہ جلوہ نما دھوپ بھی ٹلی دل سے

---

نبی کے صدقے میں بخشش عطا ہوئی اُس کو

درِ خدا پہ ہوئی جس کی حاضری دل سے

---

زباں سے نکلی تو دل میں اُتر گئی فوراً

کسی نے بات کہ جو بھی کہی سنی دل سے

---

حضور آپ کا روضہ نہ جب تلک دیکھیں

نکل نہ پائے گی وَاللہ بے کلی دل سے

---

لحد میں اُترا ہوں زادِ لحد یہی لے کر

نبی کی نعت جو لکھی پڑھی سنی دل سے

---

نبی کے روضے سے جس وقت ہم پلٹنے لگے

جلیل آنکھ میں آنسو تھے ہُوک اُٹھی دل سے