سات افلاک ترےؐ پورب و پچھم تیراؐ

سات افلاک ترےؐ پورب و پچھم تیراؐ

یا رسولِ عربیؐ سارا ہے عالم تیراؐ

---

ورفعنا لک ذکرک کا چلن ہے ہر سو

بامِ قوسین پہ لہراتا ہے پرچم تیراؐ

---

تشنہ لب دیکھ رہے ہیں تریؐ جانب آقاؐ

کس کو مطلوب نہیں کوثر و زم زم تیراؐ

---

تیریؐ مدحت ہے مری نوکِ قلم کا قبلہ

میں بھی ہوں مدح سرا سرورِ عالم تیراؐ

---

اُمتی اُمتی ہر پل تیرےؐ ہونٹوں پہ رہا

ذکر پھر شام و سحر کیوں نہ کریں ہم تیراؐ

---

محترم عیسٰی ؑ بھی موسیٰؑ بھی صفیؑ بھی لیکن

تو ہے محبوبِ خدا ذکر مقّدم تیراؐ

---

زخم ہر روز نیا شاخِ بدن پر مانگوں

ہو میسر جو ترےؐ ہاتھ سے مرہم تیراؐ

---

میرے ہونٹوں پہ رہے صلِ علیٰ کا نغمہ

ظلِ الطاف ہو اشفاقؔ پہ ہر دم تیراؐ