اے سرورِ کون و مکاںؐ صلِ علیٰ صلِ علیٰ
اے واقفِ رازِ نہاں ، صلِ علیٰ ، صلِ علیٰ
جب سامنے لجپال ہو کیسے بیانِ حال ہو
بس ہو مرا وردِ زباں ، صلِ علیٰ ، صلِ علیٰ
دُولہا شبِ معراج کے ڈنکے ہیں ہر سو آپ کے
ہیں آپ سلطانِ جہاں ، صلِ علیٰ ، صلِ علیٰ
اللہ کا احسان ہو ، ہر درد کا درمان ہو
اے مونسِ خستہ دلاں ، صلِ علیٰ ، صلِ علیٰ
نازِ قمر تیریؐ جبیں ، اے دلرُبا اے دل نشیں
محبوبِ خلاقِ جہاں ، صلِ علیٰ ، صلِ علیٰ
اے قاسمِ جود و سخاؐ اے شافعِؐ روزِ جزا
الطاف کے کوہِ گراں ، صلِ علیٰ ، صلِ علیٰ
توؐ رحمتہ اللعالمیںؐ ، تیرےؐ لئے دُنیا و دیں
کونین کی رُوحِ رواں ، صلِ علیٰ ، صلِ علیٰ
گنجینہء علم و ادب ، عالی نسب ، اُمی لقب
اے نازشِ دانشوراںؐ ، صلِ علیٰ ، صلِ علیٰ
اے ماحیء رنج و الم ، اے منبعِ لطف و کرم
اے حامیء بے چارگاںؐ ، صلِ علیٰ ، صلِ علیٰ
توؐ چاہتِ عشاق ہے ، اشفاقؔ بھی مشتاق ہے
وجہِ قرارِ عاشقاںؐ ، صلِ علیٰ ، صلِ علیٰ
شاعر کا نام :- اشفاق احمد غوری
کتاب کا نام :- صراطِ خلد