سازِ وفا پہ جھوم کے گاتی ہے چاندنی
عشقِ نبی کا راگ سناتی ہے چاندنی
خیراتِ حسن لے کے مدینے کے چاند کی
ناز و ادا سے دل کو لُبھاتی ہے چاندنی
یہ نور میرا، نورِ نبی سے ہے مستعار
یہ بات سب کو روز بتاتی ہے چاندنی
چہرے پہ مَل کے غازۂ عشقِ نبی سدا
دیوانہ اپنا سب کو بناتی ہے چاندنی
احمدؔ نبی کے حسن پہ قربان جائیے
حُسنِ نبی پہ جان لُٹاتی ہے چاندنی
شاعر کا نام :- مولانا طفیل احمد مصباحی
کتاب کا نام :- حَرفِ مِدحَت