سامنے ہیں سیّدِ ؐ ابرار اللہ الصمَد
بے نوا ہے حاضرِ درباراللہ الصمَد
اک خطا کیش اور شفاعت کی نویدِ جانّفزا
اِک فقیر اور دولتِ دیدار اللہ الصمَد
چشم، ویراں میں بہارِ روضہ خیرؐالانام
تشنہ جاں پر بارشِ انوار اللہ الصمَد
دم بخود ہوں مَیں سُنہری جالیوں کے رُوبرُو
چُپ بھی ہے پیرایہء اظہار اللہ الصمَد
درگہِ سؐرکار میں تائب ؔ ہے مشغولِ ثنا
یہ عروجِ طالعِ بیدار اللہ الصمَد
شاعر کا نام :- حفیظ تائب
کتاب کا نام :- کلیاتِ حفیظ تائب