شہِ امم کے عشق کا حسین داغ چاہئے
لحد کی تیرگی میں ضوفشاں چراغ چاہئے
حسن، حسین، فاطمہ، ابو تراب، مصطفیٰ
جہاں یہ پانچ پھول ہوں مجھے وہ باغ چاہئے
بھٹک رہے ہیں خواب ایک دید کی تلاش میں
اماوسوں کو صبحِ نور کا سراغ چاہئے
بروزِ حشر دستِ مرمریں سے اس غلام کو
حضور! آبِ سلسبیل کا ایاغ چاہئے
نہیں ہے نکتہ دانیوں کا شوق یا نبی مجھے
رہے جو آپ کا مطیع و ہ دماغ چاہئے
بنا رہا ہوں زادِ راہ لفظ لفظ جوڑ کر
سفر کی سب صعوبتوں سے انفراغ چاہئے
مرا کلام آپ کی سماعتوں کی نذر ہو
برائے حرفِ نعت جادۂ بلاغ چاہئے
شاعر کا نام :- اشفاق احمد غوری
کتاب کا نام :- صراطِ حَسّان