تیرے عاشق تیری رحمت بھال دے
کملی والے مشکلاں نوں ٹال دے
میں اجے تیکر ہاں راہواں ٹول دا
پہنچ گئے طیبہ چ میرے نال دے
چن سورج تے ستارے کہکشاں
مُل نئیں محبوب دے اک وال دے
جو خطاکاراں نوں سینے لاوندا
صدقے جاواں اُس نبی لجپال دے
قبر وچ اوہناں دی بلدے نے چراغ
یار دے دیوے جو تھاں تھاں بال دے
دور رہندے ساڈے توں لکھاں عذاب
صدقے سوہنے مصطفے دی آل دے
فرش کی اے عرش تے افلاک تے
جھنڈے جھلدے آمنہ دے لال دے
غیر دا بُوہا نہیں صائم ویکھیا
میرے آقا ہین مینوں پال دے
شاعر کا نام :- علامہ صائم چشتی
کتاب کا نام :- کلیات صائم چشتی