یہ کہتی ہیں قضائیں زندگی دو چار دن کی ہے

یہ کہتی ہیں قضائیں زندگی دو چار دن کی ہے

مدینہ دیکھ آئیں زندگی دو چار دن کی ہے

---

سنہری جالیوں کو چوم کر کچھ عرض کرنا ہے

مچلتی ہیں دُعائیں زندگی دو چار دن کی ہے

---

غمِ انساں کی اِک صورت عبادت خیز ہوتی ہے

کِسی کے کام آئیں زندگی دو چار دن کی ہے

---

وہ راہیں ثبت ہیں جن پر نشاں پائے محمدؐ کے

انہیں منزل بنائیں زندگی دو چار دن کی ہے

---

غمِ دنیا غمِ عقبیٰ یہ سب جھوٹے سہارے ہیں

کِسے اپنا بنائیں زندگی دو چار دن کی ہے

---

بیادِ کربلا ساغرؔ سدا برسیں ان آنکھوں سے

یہ رحمت کی گھٹائیں زندگی دو چار دن کی ہے