آنکھ گلابی مست نظر ہے
اللہ ہی جانے کون بشر ہے
حور و ملائک حاضرِ خدمت
عرشِ معلّی راہ گزر ہے
گیسوئے مُشکیں رُوحِ مُزمّل
رُخ پہ طلوعِ نورِ سحر ہے
ماتھے پہ روشن روشن صحرا
جلوہء رنگیں حُسنِ قمر ہے
اَبروئے عالی آیۂ قرآں
سینۂ اقدس کانِ گہُر ہے
مُہرِ نبوّت پُشت پناہی
مسندِ یزداں آپؐ کا گھر ہے
چاند ستارے نقش کفِ پا
منزلِ ہستی گردِ سفر ہے
صبر و قناعت شانِ رسالتؐ
سطوتِ شاہاں زیر اثر ہے
غارِ حرا تھی اس کی کمائی
ساری خدائی جس کا ثمر ہے
نامِ محمدّؐ جگ اُجیالا
لوگ کہیں جسے کملی والا
شاعر کا نام :- ساغر صدیقی
کتاب کا نام :- کلیاتِ ساغر