چمک جائے گا تشنگی کا نگینہ
مِرا جام ہے اور شرابِ مدینہ
خوشا عشقِ آلِ محمدّؐ میں مرنا
یہی ہے یہی زندگی کا قرینہ
نگاہِ محمدّؐ کی تابانیوں سے
مہ و مہر کو آگیا ہے پسینہ
جسے مل گئی خاکِ پائے محمدّؐ
اُسے مِل گیا عِشرتوں کا خزینہ
مرِے گلستاں میں بہاروں کے خالق
بڑی دیر سے ہے خزاں کا مہینہ
مدد یا محمدّؐ ! ڈراتی ہے مُجھ کو
یہ مکّار دُنیا یہ رہزن حسینہ
حبیبِ خُدا ناخُدا جس کے ساغرؔ
بھنور میں بھی محفوظ ہے وُہ سفینہ
شاعر کا نام :- ساغر صدیقی
کتاب کا نام :- کلیاتِ ساغر