یہ غم نہیں ہمیں روزِ حساب کیا ہوگا

یہ غم نہیں ہمیں روزِ حساب کیا ہوگا

کہ واصفانِ نبی پر عذاب کیا ہوگا

---

مجھے یقین ہے ناخوش نہیں ہیں مجھ سے حضورؐ

میں نعت کہتا ہوں مجھ پر عتاب کیا ہوگا

---

گناہ گار تو میں ہوں ‘ مگر حضورؐ کا ہوں

حضورؐ ہوں گے تو مجھ پر عذاب کیا ہوگا

---

میرے تو ہاتھ میں ہوگا حضورؐ کا دامن

مرے گناہوں کا اس دن حساب کیا ہوگا

---

درود پاک کا میں ورد ہی نہ چھوڑوں گا

تو کوئی مجھ سے سوال و جواب کیا ہوگا

---

دھرا ہی کیا ہے مرے پاس آنسوؤں کے سوا

گداگروں سے حساب و کتاب کیا ہوگا

---

مرے تو سر پہ ہے تاجِ غلامئ سرکار

مری طرح کوئی عزّت مآب کیا ہوگا

---

خطاب ہوتے ہیں شاہی مصاحبوں کے لیے

میں بادشاہ ہوں ‘ میرا خطاب کیا ہوگا

---

میں لاکھ شانِ نبیؐ میں کہوں قصیدہ کوئی

وہ حسب شانِ رسالت مآب کیا ہوگا