نبی کا روضہء اقدس جہاں ہے

نبی کا روضہء اقدس جہاں ہے

وہاں کا چپّہ چپّہ آسماں ہے

---

وہ جلوہ گاہ ہے نور الہدیٰ کی

وہاں کا ذرّہ ذرّہ کہکشاں ہے

---

وہاں کی ہر گلی نکہت بد اماں

وہاں کا گوشہ گوشہ گلستاں ہے

---

وہاں کا خار بھی رشکِ گلستاں

وہاں کا دشت بھی باغِ جناں ہے

---

وہاں کی صبح بھی تسکین خاطر

وہاں کی شام بھی آرام جاں ہے

---

ہوا بھی دل نواز و روح افزا

فضا بھی عطر بیز و گل فشاں ہے

---

وہی فردوس بریں روئے زمیں ہے

وہی رشکِ چہارم آسماں ہے

---

وہاں ہر قدم پر جلوہ گاہیں

تو ہر منظر میں ایمن کا سماں ہے

---

دیارِ پاک کا دریوزہ گر بھی

رئیس الملک ہے ‘ شاہِ جہاں ہے

---

مدینے کی گلی کیا ہے نہ پوچھو

وہاں کی خاک بھی جنسِ گراں ہے

---

مقاماتِ حسیں تو اور بھی ہیں

مگر اتنا حسیں کوئی کہاں ہے