ہر چند بندگی کی جزا ہی کچھ اور ہے

ہر چند بندگی کی جزا ہی کچھ اور ہے

تقلیدِ مصطفیٰ ﷺ کا صلہ ہی کچھ اور ہے

---

لطفِ غزل بھی خوب ہے اپنی جگہ مگر

توصیفِ مصطفیٰ کا مزا ہی کچھ اور ہے

---

جنت کی نعمتوں سے میں منکر نہیں ‘ مگر

شہرِ نبیﷺ کی آب و ہوا ہی کچھ اور ہے

---

عشقِ رسولؐ کیا ہے مسیحا کو کیا خبر

اس دردِ جانفزا کی دوا ہی کچھ اور ہے

---

طوفِ حرم کے وقت بھی تھا طیبہ دھیان میں

دربارِ مصطفیٰ کی فضا ہی کچھ اور ہے

---

شاہی سے بے نیاز‘ فقیری میں سرفراز

اس در کے سائلوں کی ادا ہی کچھ اور ہے

---

اس در پہ بھیک ملتی ہے بے حد و بے طلب

سرکارؐ کا مزاج عطا ہی کچھ اور ہے

---

قدموں سے اُن کے بڑھ کے لپٹ جاؤ عاصیو

آقاؐ کی شانِ عفوِ خطا ہی کچھ اور ہے

---

عمرہ ہو اس سفر کا سبب یا مشاعرہ

اس شوق اور کشش کی بنا ہی کچھ اور ہے

---

ملکِ حجاز‘ شہرِ نبیﷺ بابِ جبرئیل

اقباؔل نعت گو کا پتا ہی کچھ اور ہے