ہِک دن مَیں پیا دل وچ رُوواں ہتھوں جُرم خطائیں ھُو
آکھاں کملی والیا سائیاں عرضی نہ ٹُھکرائیں ھُو
میں ڈُبیا دریا گُناہاں پَیراں تُوں سِر تائیں ھُو
بخشش جو گا مُول نہ ریہا حدّوں ودھ خطائیں ھُو
ساہواں دے مُکنٹر تھیں پہلاں آ دیدار کرائیں ھُو
پہلی رات قبر دی میری مُکھ دا نُور و سائیں ھُو
کوثر پیالا پاکاں والا مینوں گھُٹ پلائیں ھُو
جد اعمال تر کڑی تُلسن جھات کرم دی پائیں ھُو
مَیں ڈر ساں مِرے کول کھلووِیں چھَڈ کے دُور نہ جائیں ھُو
عمل کُچجّے پینڈے لمے ڈِگدی نوں گل لائیں ھُو
رحمت والا ہتھ لمیارِ یں پُل صراط ٹپائیں ھُو
حضرت بولے عاصی بندیا روگ نہ دل نُوں لائیں ھُو
ہتھ میرا تری کنڈ تے رہسی حشر دہاڑے تائیں ھُو
ہو سکّی تے سال دا پھیرا شہر میدنے پائیں ھُو
بُو ہا میرا نہ چھوڑِیں ، مِرے بُو ہے تے آئیں جائیں ھُو
ہلسن ہوٹھ شفاعت میرے تھیسن رَدّ بلائیں ھُو
تُوں کیوں روویں تُوں کیوں چِیکیں میں ہاں تیرے تائیں ھُو
میں جانڑاں میرا مالک جانڑیں اَینویں نہ گھبرائیں ھُو
ہُن کی خوف نصیرؔ مینوں مرا جیوے سِر دا سائیں ھُو
شاعر کا نام :- سید نصیرالدیں نصیر
کتاب کا نام :- دیں ہمہ اوست