اے خُدا
میری دُعا ہے کہ میں جب تجھ کو پُکارو ں
تو مری رات کے ماتھے پہ ترے نام کا سورج دہکے !
اے خُدا
میری دُعا ہے کہ کسی صبح جب آنکھیں کھولوں
میری سانسوں میں تر قُرب کا گلشن مہکے !
اے خُدا !
میری دُعا ہے کہ گجر دم کی پر اسرار فضاؤں میں ترا نطق !
کسی شاخِ برہنہ پہ اُترتی ہوئی چڑیا کی طرح
اے خُدا !
میرے دِل میں
کسی بے نام سے احساسِ مسرت سے مسلسل ۔۔۔ چہکے !
اے خُدا !
میری دُعا ہے کہ تُو افلاک سے اک بار ’ بس اک بار اُتر کر
مرے صحراؤں پر
اوس میں بھیگے ہوئے سبزہ ء نور ستہ کی مانند
مری حدِ نظر تک لہکے !
شاعر کا نام :- احمد ندیم قاسمی
کتاب کا نام :- انوارِ جمال