میں ! کہ بے وقعت و بے مایہ ہوں

میں ! کہ بے وقعت و بے مایہ ہوں

تیر ی محفل میں چلا آیا ہوں

---

آج ہوں میں ترا دہلیز نشیں

آج میں عرش کا ہم پایہ ہوں

---

کائناتوں پہ مَیں تیرے دم سے

آسمانوں کی طرح چھایا ہوں

---

چند پَل یوں تری قربت میں کٹے

جیسے اِک عمر گزار آیا ہوں

---

جب بھی میں اَرض ِ مدینہ پہ چلا

دل ہی دل میں بہت اِترایا ہوں

---

تیرا پیکر ہے کہ اِک ہالہء نور

جالیوں سے تجھے دیکھ آیا ہوں

---

کتنی پیاری ہے ترے شہر کی دھوپ

خود کو اکسیر بنا لایا ہوں

---

یہ کہیں خامئ اِیماں ہی نہ ہو

میں مدینے سے پلٹ آیا ہوں