لائقِ حمد حقیقت میں ہے خلّاقِ جہاں

لائقِ حمد حقیقت میں ہے خلّاقِ جہاں

منتظر جس کے اشارے کے ہیں سارے امکاں

---

اس کے ارشاد سے ذروں میں توانائی ہے

اس کے الطاف سے ہے زیست کراں تابہ کراں

---

اس کی قدرت کے مطاہر مہ و مہر و مّریخ

بحرو بر، دشت و جبل اس کی جلالت کے نشاں

---

بھیجتا رہتا ہے وہ ابر و ہوا کے قصد

سبزہ و گل سے وہ بھرتا ہے زمیں کا داماں

---

نہ کوئی اس کے سوا حشر کے دن کا مالک

نہ کوئی اس کے سوا دہر میں مختارِ اماں

---

وہ کسی سے بھی نہیں اور نہ کوئی اس سے

اس پہ بھی رکھتا ہے ہر شخص سے وہ رشتہ جاں

---

اس نے آدم کو دیا اپنی نیابت کا شرف

اس کے احسان بھلا سکتا ہے کیسے انساں

---

منکروں کا بھی وہی رزق رساں ہے تائبؔ

بے نیازی ہے حقیقت میں اسی کی شایاں