رب کے کرم سے حمد کی محفل سجاسکے
رب کی رضا نہ ہو تو یہاں کون آسکے
حکمِ خدا بغیر نہ آئے نہ جاسکے
تنکا کبھی نہ مرضی سے اپنی اُٹھاسکے
در چھوڑ کر خدا کا نہ جائیں اِدھر اُدھر
اے کاش عقلِ انساں میں یہ بات آسکے
اللہ کے سوا بھی کوئی ہے تو پھر بتائو
ویران دل میں میرے کوئی گُل کھِلاسکے
راضی خدا کو کرلے کہ رب کی رضا بغیر
ممکن کہاں کہ باغِ ارم میں تو جاسکے
پہچان آدمی کو نہ اپنی ہو جب تلک
ممکن نہیں خدا کی حقیقت کو پاسکے
خوفِ خدا سے قلب ہے خالی اِسی لیے
حق بات کو زبان پر انساں نہ لاسکے
دنیا میں غرق ہوگئے، سوچا نہ یہ کبھی
اللہ سے جو وعدہ کیا تھا نبھاسکے
خواہش ہے حج مرا، مِری عشرت؎ کے ساتھ ہو
یہ طاہرِؔ حزیں بھی ترے گھر میں آسکے
شاعر کا نام :- طاہر سلطانی
کتاب کا نام :- پیشِ خدا ہوں حمد کا دیواں لیے ہوئے