روشن جہاں میں ہر جا پاتا ہوں نور تیرا

روشن جہاں میں ہر جا پاتا ہوں نور تیرا

ہر شے میں دیکھتا ہوں پیارے ظہور تیرا

---

از ماه تا بماہی ہے تیری بادشاہی

دکھلا رہا ہے کیا کیا عالم ظہور تیرا

---

گلشن میں چپکے چپکے لیتے ہیں نام غنچے

اور بلبلوں میں دیکھا ہر سمت شور تیرا

---

کیوں تلملا کے گرتے غش کھا کے طور پر وہ

گر چوندھیا نہ دیتا موسیٰ کو نور تیرا

---

گر ٹھیرتا تصور تیرا ہمارے دل میں

کچھ پوچھتے نشاں ہم تجھ سے ضرور تیرا

---

صد حیف ہو کے انساں کچھ بھی نہ کر سکے ہم

کرتے ہیں ذکر باہم وحش و طیور تیرا

---

منصور کا یہ منھ تھا کہتا جو انا الحق

برپا کیا ہوا تھا سارا فتور تیرا

---

بنتے ہی بندہ بت پی لے مئے محبت

آنکھوں میں وہ نشہ ہے دل میں سرور تیرا

---

بیدم کی آرزو ہے ہر دم یہ جستجو ہے

مل جائے کاش اس کو قرب و حضور تیرا