صد شکر کہ یوں وردِ زباں حمدِ خدا ہے

صد شکر کہ یوں وردِ زباں حمدِ خدا ہے

وہ سب سے بڑا ، سب سے بڑا ، سب سے بڑا ہے

---

اس کا کوئی ثانی ، نہ مشابہہ ، نہ مقابل

وہ سب سے جُدا، سب سے جُدا ، سب سے جُدا ہے

---

کافر ہو کہ مسلم ، کوئی مشرک ہو کہ مومن

وہ سب کا خدا، سب کا خدا ، سب کا خدا ہے

---

وہ خالقِ کونین بھی ، وہ رزّاق جہاں بھی

وہ ربِ عُلی ٰ، ربِ عُلیٰ ، ربِ عُلیٰ ہے

---

یہ رنگ ، یہ خوشبو ، یہ بہاریں ، یہ فضائیں

سب اُس کی عطا ، اُس کی عطا ، اُس کی عطا ہے

---

معراجِ عبادات بھی ، معراجِ سخن بھی

صرف اُس کی ثناء، اُس کی ثناء، اُس کی ثناء ہے

---

اقبؔال لئے جاؤ سدا نام خدا کا

جو دل کی جلا، غم کی دوا ، دُکھ کی شفا ہے