سر رشتۂ کُن فکاں محمدؐ

سر رشتۂ کُن فکاں محمدؐ

سرمایہء جسم و جاں محمدؐ


جس امر کا نام ہے مشیّت

اُس امر کے رازداں محمؐد


نیرنگیء رمزِ غیب و حاضر

اللہ نہاں‘ عیاں محمدؐ


کونین سے تا بہ لوحِ محفُوظ

لکھا ہے کہاں کہاں محمدؐ


تخلیق کے دائروں کے محور

کونین کے پاسبان محمدؐ


ہر قول صداقتوں کا حامل

قرآن ہے جسم‘ جاں محمدؐ


وہ جس کا خُدا ہوا ثنا خواں

وہ ذات ہے بے گماں محمدؐ


حیرت میں ہے فکر کی رسائی

پہونچے ہیں کہاں کہاں محمدؐ


ہوتا ہے زباں پہ اللہ اللہ

کہتا ہے رُواں رُواں محمدؐ


پڑھتا ہوں درُود دِل ہی دِل میں

کہتی ہے اگر زباں محمدؐ


اے صلِّ علیٰ وہ نامِ نامی

اے چارۂ بے کساں محمدؐ


گمراہ کے واسطے ہدایت

عاصی کے لئے اماں محمدؐ


مدحت تو ادا ہوئی ہے کس سے

بس یہ کہ کہے زباں ” محمدؐ“


میں خُود بھی حنیفؔ جانتا ہوں

یہ نعت کہاں، کہاں محمدؐ

شاعر کا نام :- حنیف اسعدی

کتاب کا نام :- ذکرِ خیر الانام

سرورِ ذیشان شاہِ انبیاء یعنی کہ آپ

اے خدا! اپنے نبی کی مجھے قربت دے دے

تُو ایک قلزمِ رحمت وسیع و بے پایاں

میں شہنشاہِ ؐ دو عالم کے پڑا ہوں

یہ کرم یہ بندہ نوازیاں کہ سدا عطا پہ عطا ہوئی

!لب پہ نعت و سلام ہے آقا

بگڑی ہوئی امت کی تقدیر بناتے ہیں

جوبنوں پر ہے بہارِ چمن آرائی دوست

وہ سُوئے لالہ زار پِھرتے ہیں

پنجابی ترجمہ: تنم فرسُودہ جاں پارہ ز ہِجراں یارسُولؐ اللہ