اے امامِ جعفر صادق امامِ اولیا
نورِ چشم سیّد ِ باقر امامِ بے ریا !
تیرے چہرے سے عیاں ہے خوئے زین العابدیں
تیری پیشانی پہ ہے شبیّر کا نورِ جبیں
واقف و دانائے علمِ ظاہری وباطنی
زینتِ بزمِ شہِ مشکل کُشا مولا علی
السلّام اے ہادیِ راہِ طریقت السّلام
السّلام اے حاملِ بارِ امامت السلام
السّلام اے نور چشمِ رحمتُ العّلٰمیں
السّلام اے ناخدائے کشتیِ دینِ مُبیں
اے مرے ٹوٹے ہوئے دل کے سہارے السلام
اے مری روتی ہُوئی آنکھوں کے تارے السّلام
اپنے اعظمؔ کی طرف بھی اک نِگاہ التفات
مانتا ہے خالقِ اکبر تری ہر ایک بات
شاعر کا نام :- محمد اعظم چشتی
کتاب کا نام :- کلیاتِ اعظم چشتی