عشق نے جتھے دکاناں کھولیاں
اوندیاں بن بن کے اوتھے ٹولیاں
بھل گئیاں اوہ بولیاں سب جگ دیاں
تیریاں سنیاں جہاں نے بولیاں
کیوں نہ گاواں گیت میں لج پال دے
میریاں لج پال بھریاں جھولیاں
خیر پا اونہاں نوں وی آج خیر پا
تیرے در تے جو وی آئیاں گولیاں
پیر دے جو آسرے تے ٹھل پیاں
اوہ سیاں مڑ کے کدی نئیں ڈولیاں
پیر پایا عشق دے ویہڑے جنہاں
عشق نے پھڑ کے اوہ جنگلیں رولیاں
پھیرا پایا خورے کیوں نئیں ڈھول نے
میں تے مندڑا نئیں کدی وی بولیاں
تک لیا جنہاں نیازی پیر نوں
اونہاں نئیں مڑ کے کتاباں پھولیاں
شاعر کا نام :- عبدالستار نیازی
کتاب کا نام :- کلیات نیازی