کربل دے ایہہ جیالے
وصفاں دے وچ نرالے
دین آئے نیں شہادت
حق دی پچھان والے
ہستی دے رستیاں تے
کرن آئے نین اجالے
ایمان دے حوالے
راہی ایہ حق دے راہ دے
بندے ایہ پیار دے نیں
دین اتوں اپنا تن من
گھر بار وار دے نیں
پھل اپنے خون والے
تھل وچ کھلار دے نیں
قاصد بہار دے نیں
ہر متھے توں اے ظاہر
کردار قافلے دا
عباس چکیا جھنڈا
جی وار قافلے دا
تصویر عظمتاں دی
سالار قافلے دا
سردار قافلے دا
جگ دیندا اے سلامی
ایہناں مجاہداں نوں
پھلاں جیہے بچّیاں نوں
باپردہ بیبیاں نوں
لبھدے اے ساری دُنیا
حُر ورگے سنگیاں نوں
جُرات دے پیکراں نوں
شاعر کا نام :- حفیظ تائب
کتاب کا نام :- اَصحاَبِی کَاالنُّجُوم