رکھتے ہیں میرے آقا سارے جہاں کی خبریں

رکھتے ہیں میرے آقا سارے جہاں کی خبریں

تحت الثریٰ سے لے کر ہر آسماں کی خبریں

---

جل جائیں جس سے آگے روح الامیں کے پر بھی

سرکار جانتے ہیں بےشک وہاں کی خبریں

---

احوالِ عرش و کرسی میزان و پُل سے واقف

کِیں مرحمت خدا نے ان کو جِناں کی خبریں

---

افلاک کی مُسافت کتنی ہے کتنے تارے

سرکار جانتے ہیں ہر کہکشاں کی خبریں

---

وہ نیک یا کہ بد ہے انجام اس کا کیا ہے

مولانے اُن کو دی ہیں ہر اِنس و جاں کی خبریں

---

ہو کر رہیں گی پوری لاریب ہیں وہ سچی

دیکھے گا سارا عالم کُن کی زباں کی خبریں

---

آئیں گے ابنِ مریم، حضرت امامِ مہدی

سرکار دے رہے ہیں ہر ہر نشاں کی خبریں

---

احوال سب عیاں ہیں سرکار دے رہے ہیں

جنگ و جدل کی خبریں امن و اماں کی خبریں

---

مرزا یہی عقیدہ دل میں بسائے رکھنا

ہو کر رہیں گی ظاہر اس غیب داں کی خبریں