اوصاف بے نظیر ہیں اور ذات بے مثال

اوصاف بے نظیر ہیں اور ذات بے مثال

آقائے دو جہاں کی ہے ہر بات بے مثال

---

جود و کرم کے ابر برستے ہیں روز و شب

گہوارۂ نبیؐ کی ہے برسات بے مثال

---

رشکِ گلِ ارم ہیں مدینے کے خار و خس

انجم صفت ہیں طیبہ کے ذرّاتِ بے مثال

---

جس کی طلب میں کاسہ بکف ہیں شہ و گدا

دربارِ مصطفیٰؐ کی ہے خیرات بے مثال

---

کوثر کی مثل لانے میں عاجز رہے عرب

قرآن کی تمام ہیں آیات بے مثال

---

باطل کو پھر بھی مات ملی حق سے بدر میں

رکھتا تھا جب کہ حرب کے آلات بے مثال

---

عمرِ تمام ان کا نہ لا پائے گی جواب

گزرے ہیں جو مدینے میں لمحات بے مثال

---

اوصافِ چار یار نبیؐ کے میں کیا لکھوں

چاروں تھے صاحبانِ کمالات بے مثال

---

احسؔن درِ رسولؐ کی نیرنگیاں نہ پوچھ

ہے لاجواب وقتِ سحر، رات بے مثال