آئے نبی بہت مگر ان سا کوئی نبی نہیں

آئے نبی بہت مگر ان سا کوئی نبی نہیں

جیسے سخی ہیں مصطفیٰ ایسا کوئی سخی نہیں

---

سب کی خبر ہے آپ کو سب پر نظر ہے آپ کی

جس کو نہ ہو کوئی خبر ایسا مرا نبی نہیں

---

غیر کی سمت کیوں تکوں دنیا کا کیوں گدا بنوں

اس کا گدا ہوں جس کے گھر دیکھی کوئی کمی نہیں

---

میری ہر اک خوشی کا راز تیری خوشی میں ہے نہاں

جس میں نہ ہو تری خوشی ایسی خوشی خوشی نہیں

---

وجہ قیام دو جہاں رونق بزم کن فکاں

تو ہے مکین لا مکان تری مثال ہی نہیں

---

نور مہ و نجوم میں لالہ و گل کے رنگ میں

کونسی ہے جگہ جہاں جلوہ گری تری نہیں

---

خواب میں آ گئے کبھی در پہ کبھی بلا لیا

مجھ کو نوازتے نہ ہوں ایسا ہوا کبھی نہیں

---

زاہد خشک کو کہاں اس کی خبر اے دوستو

جس میں نہ ہو خیال یار بندگی بندگی نہیں

---

جب سے در حضور کی مجھ کو ہوئی ہے حاضری

مجھ پر کرم ہیں آپ کے مجھ کو کوئی کمی نہیں

---

مری نیازی زندگی ہے یہ عطائے مصطفیٰ

ان کا کرم نہ ہو اگر زندگی زندگی نہیں