بن تیرے ذکر دے گل کوئی میں جان دا سوہنیا ہور نہیں
ترے در تے سہارا بن تیرے ہُن آن دا سوہنیا ہور نہیں
سب نبی خُدا نُوں پیارے نے سب اُچیاں شاناں والے نے
محبوب پیارا بن تیرے رحمان دا سوہنیا ہور نہیں
تُساں اَوْ اَدْنى دى خلوت وچ دیدار خُدا دا کیتا اے
جویں تساں پچھانیاں خالق نوں پہچان دا سوہنیا ہور نہیں
جو نعمتاں کول ہی خالق دے سب ختم تُساں تے کر چھڈیاں
مطلوب تے مقصد بن تیرے یزدان دا سوہنیا ہور نہیں
میرے عیب حسابوں ودھ گئے نے حد رہی نہیں میریاں عیباں دی
تیری باہجھ شفاعت ڈھنگ کوئی بچ جان دا سوہنیا ہور نہیں
بن تیرے کس ول ویکھاں میں بن تیرے کس در جاواں میں
بن تیرے مالک صائم دی جند جان دا سوہنیا ہور نہیں
شاعر کا نام :- علامہ صائم چشتی
کتاب کا نام :- کلیات صائم چشتی